Die ou mensdom is darem maar ʼn snaakse spul.
Partykeer wonder ek oor die sogenaamde “supremiteit”
van die spesie. Die waarheid is natuurlik dat alle mense is maar net die skepsel
van die gewoonte (creatures of habit). Wie jy is, is die somtotaal van jou
gewoontes. Jou gewoontes word gevorm uit jou waardesisteem en beginsels en dit
bepaal die paradigma waarna jy na jou huidige en toekomstige situasie kyk en
hoe jy leef. Want jou gewoontes word gevorm uit jou paradigmas.
Vóór ek nou te filosofies raak (maar in die
hoop dat iemand dit dalk net raak lees en dit iets vir daardie persoon beteken),
die punt wat ek wil maak is dat mense se gewoontes waaruit hulle leef, dikwels
ook deur hul vrese gevorm word. Met ander woorde, hoe jy oor ʼn saak dink en
voel, is gebore uit jou vrese, of dit nou werklik is of nie, of dit die
waarheid is of nie en ook nie of dit jou weerhou van ʼn lewe van oorvloed nie.
(Laasgenoemde is natuurlik ook ʼn paradigma, maar ander dag op ʼn ander plek meer
hieroor.)
Wanneer dit kom by hipnose, is dit seker, naas
die evangelie self, die een saak of vakgebied waaroor daar die meeste vals
paradigmas bestaan. Idees, vrese en opinies op alles behalwe die waarheid gevorm
is.
Daarom my stelling vroeër dat die mens homself
meeste van die tyd nie juis gedra soos die superieure spesie nie.
Wanneer ek aan mense noem wat ek vir ʼn lewe doen
en dat ek ook ʼn hipnoterapeut is wat van hipnose gebruik maak om mense te help
om ʼn lewe van oorvloed in alles aspekte van hul menswees te leef, kry ek
uiteenlopende reaksies.
Maar een van die reaksies wat omtrent deur die
bank uitkom, is iets soos: “O dan moet ek versigtig wees.” En daarna: “Kan jy
regtig mense hipnotiseer?”
Nou die eerste reaksie, gewoonlik met ʼn laggie
saam of ligsinnig gesê, is maar eintlik om onkunde, vrees en verbasing weg te
steek. Want ʼn hipnotiseur is mos so snaakse omie met ʼn pers baadjie aan en ʼn bokbaardjie
wat mense soos hane laat kraai of ʼn tannie met sulke veelkleurige los lapperige
klere wat sy grasieus rondswaai terwyl respektabele vroue onfatsoenlik op die
verhoog rondkruip en spektakels van hulself maak. Of iets in dier voege.
Die daaropvolgende vraag, “Kan jy mense regtig
hipnotiseer?”, verbaas my, asof dit iets ongewoon en snaaks is om “mense te hipnotiseer”.
Wel vir die meeste mense is dit, maar nie vir die “ingeligtes” nie. En daarom
wil ek juis mense se paradigma bietjie skuif deur net basiese inligting te deel
sodat perspektiewe kan regskuif soos mense ingelig word deur die waarheid.
Wat my by die tweede deel van die mensdom se reaksies
bring. Mense is nuuskierig, maar verkies om op die kantlyn te staan.
Weereens is hipnose en die evangelie oor
dieselfde kam te skeer. As niks meer werk nie, dan begin mense gewoonlik in alle
erns te bid, asof dit die laaste uitweg is – wat wys dat hulle nie dit glo nie,
maar op die einde van hul moontlike oplossings is (ʼn blogonderwerp vir ʼn ander
keer).
Dieselfde met hipnoterapie. Wanneer geen
behandeling, of dit nou op mediese, psigologiese, emosionele, liggaamlike of
selfs geestelike vlak is, nie wil help
nie en ál die moontlikhede ontgin is, sal mense uit nood ʼn hipnoterapeut gaan
sien waar die persoon meestal geholpe sal raak.
In die volgende paar weke wil ek alle mites,
miskonsepsies en vrese die nekslag toedien. En veral ook weerstand vanuit die
godsdienstige beskouinge in perspektief stel.
Want
is dit nie interessant hoe uitgesproke mense oor onderwerpe en studievelde is
waarvan hulle niks weet nie? Mense sal hulself dikwels in die fynste
besonderhede as “kenners” uitspreek oor iets wat hulle op hoorsê by Tant Annie gehoor
het wat dit by haar niggie gehoor het wie se seun ʼn kelner is wat na professor
so-en-so wat iets aan tafel verduidelik het en hy in die verbygaan gehoor het.
En dan glo hulle hulself.
Nou
bogenoemde voorbeeld is seker ʼn bietjie ekstreem. Maar om terug te kom na my
punt heel bo, almal het paradigmas of geloofsisteme wat gegrond is op bepaalde
kennis, maar nie noodwendig die waarheid nie.
So
om dié blog mee af te sluit wil ek
enkele van dié miskonsepsies oor hipnose vir ʼn ses slaan.
In
ʼn empiriese navorsingstudie waaraan twee groepe voorgraadse studente
vrywilliglik aan deelgeneem het, het hulle vrae oor hipnose beantwoord. Een was
ʼn waarnemingsgroep en die ander groep is daarna oor ʼn tydperk persoonlik aan
hipnose blootgestel (ʼn paar van dié groep wou nie gehipnotiseer word nie). Daarna
is dieselfde vraelyste weer voltooi en die resultate vergelyk.
Hier
is die bevindinge oor vyf miskonsepsies wat by die meerderheid van die studente
in beide die groepe vóór die blootstelling aan hipnose bestaan het, maar wat ná
afloop van die ervaring verander het.
1. Hipnose
is ʼn veranderde toestand van bewustheid
2. Die
ervaring van hipnose het alles te make met die hipnotiseer se vermoëns
3. Gehipnotiseerde
mense is nie bewus van wat om hul aangaan nie
4. In
Hipnose sal mense die waarheid praat oor goed waaroor hulle normaalweg sal lieg
en
5. Suggesties
(of voorstelle onder hipnose) is so kragtig dit kan nie weerstaan word nie
Meeste
mense sal erken dat hierdie van die miskonsepsies oor hipnose is wat by hul
bestaan. En dat ons opinies hoofsaaklik gevorm is deur dit wat aan ons opgedis
word uit Hollywood in flieks en TV-reekse of dalk ʼn humoristiese
verhoogvertoning (sal in ʼn volgende blog hieroor skryf) wat die persoon
bygewoon het.
So
wat is dan die waarheid:
1. Hipnose
is slegs ʼn ontspanne toestand waarin die onderbewuste (sub-conscious) na vore
kom en die bewuste brein na agter skuif. Dit is dus nie ʼn ander vorm van bewustheid
nie (met ander woorde jy is nie in ʼn toestand buite jou normale self nie), maar
slegs só ontspanne dat die onder-bewuste direk begelei kan word.
2. Alle
hipnose is self-hipnose. Daar bestaan nie iets soos iemand wat nie
gehipnotiseer kan word nie. Of laat ek dit meer wetenskaplik stel, studies het
bevind dat die grootste meerderheid mense gehipnotiseer kan word. Die vermoë om in
hipnose te gaan het alles te doen met die persoon se gewilligheid om te ontspan
en die proses te aanvaar en weinig met die hipnotiseer (natuurlik help die
kennis en ervaring wat die hipnotiseer het om die persoon maklik en professioneel
in die proses te begelei).
3. Jy
sal altyd bewus wees van alles wat om jou aangaan wanneer jy in hipnose is en elke
woord hoor wat die hipnotiseer sê. Jy kan ook enige tyd gedurende ʼn sessie uit
hipnose kom as jy so sou besluit. Die reaksie van omtrent al my eerste kliënte
ná die tyd is dat hulle verbaas is dat hulle van alles bewus was en dan twyfel
of hulle wel in hipnose was.
4. Jy
sal nooit enige geheime weggee wanneer jy in hipnose is nie. Omdat jy in hipnose
self besluit wat jy wil bekendmaak en wat nie, sal jy niks weggee of sê wat jy
nie ook in ʼn bewustelike toestand sal doen nie.
5. Jou
totale menswees word beheer vanuit jou onderbewuste (sub-conscious). Àl jou
waardes, beginsels en geloofsisteem. Wanneer jy iets in jou lewe wil verander of
beter wil doen wat die hipnoterapeut deur ʼn suggestie aan jou oordra, is dit omdat
jy bewustelik en in jou onder-bewuste daartoe toestem. Byvoorbeeld, as jy wil
ophou rook, en jy het reeds die wilsbesluit geneem, dan gee jy toestemming dat
sekere suggesties jou in dié proses sal help).
Wanneer
ons kennis oor ʼn saak met die waarheid oor die bepaalde vakgebied gevoed word,
stel dit ons in staat om baie meer verantwoordelike besluite te neem op grond
van dié kennis. Só besweer ons ook vrese wat gewoonlik op hoorsê en
wanvoorstellings gegrond is.
En
dit is die doel van dié blog, om jou te help om goeie ingeligte besluite te
neem.